FJ Schneider Heimatdichter Denkmal Aan et Freudeblömche Jahrbuch Seite 91 92 93 94 95 96 97
Wie die Ahle songe... CD 30.11.1969 Et Freudeblömche 1922 Us Heimatlied - En Rondfahrt 25.März 1998 Ming Heimat

Das folgende Gedicht erschien im April 1973 in der Honnefer Volkszeitung,
also vier Monate nach dem Tode Franzjosef Schneiders.
Es war in seinem Foto-Tagebuch unter dem Datum "18. Oktober 1971" gefunden worden.
Es war also gut ein Jahr vor seinem Tode auf einer der noch freien Seiten
für die letzten Jahre seines Lebens eingetragen worden und trägt die Überschrift:


"Et letzte Bild"

"Dat eß mi letzt Bild
et Konterfei, noh dämm de Vorhang fillt;
et zeich kein Farv mieh em Jeseech,
un wie en ußjebrannte Käez kei Leech.

Et Jrön vum Fröhjohe un et Bunt vum Somme,

de Dud hätt alles, alles fottjenomme;
sujah et letzte herbslich Jrau un Jries
un selevs dat wenteliche kahle Wieß.
Nu lächt de Deckel langsam üvve mich,
ich sinn et doch nit mieh, ich sinn vedrüch.
Behaalt mich su, wie ich im Lävve stund,
lebendig als Erinnerung im Mund!"
 

 

Aan et Freudeblömche

(Ansprache zur Einweihung des Denkmals für Franzjosef Schneider am 7. November 1998)

von Willi Birenfeld       

Leewen Franzjosef Schneider,

 

jetz schwätzen ich, wie uß beids de Muul jewaaße es, jetz es et Zick füe uß Mottesproch, die Die emme su am Häzze looch - un mie och.

Wat Du Die in dämm Jedich, dat mie jrad gehüet hann, jewönsch häss, dat es in all dänne Johre noh dingem Duud he in Honnef un Umjebung in Erfüllung jejange: mie hann Dich wirklich su, wie Du im Läwwe stunds, lebendig als Erinnerung im Mund behaale. Wie off hann die ahl Honneve, die Dich noch jekannt hann, wie Du ene bejähnt beß, op de Stroß, in de Säle, bei de jruuße Feste, un met ene jeklaav häss, die Ding Böche geläse hann un die se och vestunnte, weil se de Mottesproch noch spreche un läse künne, wie off hann se von Die vezallt met enem Lööchte in de Oure, met laachende Stemm, met Freud em Häzze.

Un zick e paa Johe wäeden et emme mieh, die sich bejeistere losse, wenn se zo dänne Vüeträch kumme, bei dänne Ding Erzählunge, Ding Betrachtunge, Ding Anekdote und Ding Jedichte, haupsächlich in de Mottesproch, lebendig wäede, weil eene Die sing Stemm un sing Häzz leiht. Ävve mannichmol künne me sujah Ding eijene Stemm vum Band hüre, un Ding Bild es mietstens och dobei. Zolätz, du häss et seche von do boven jesehn, woe dat esu im Aprel im Kuesaal bei de Jedächnisfeie füe Dich: mie hätten och ene vill jrütere Saal voll jehatt, su jruuß woe de Aandrang, als de Minsche och bloß ad jätt lögge jehuet hatte, worömm et jing.

Wie de siehs, Du beß un blievs lebendig als Erinnerung im Mund.

Ävve eenem onder uns woe dat alles noch nit jenooch, dä hatt sich ad lang in de Kopp jesatz, der Erinnerung aan Dich mieh Jewich ze jävve, mieh Bestand, un Dich in et Stadtbild von Honnef heimzeholle. Du häss seche och ad lang jewoss, wäe dat woe: he, de Bornheims Rolf, däe su an Die hängk, Die su dankbae es, dat hä nue drop jewaat hätt, dä richtije Moment zo erwische, ömm Die e Denkmal zo setze, un dann kein Rauh jejävve hätt, bes et esu wiet woe. Un op die Art un Wies zeich hä och sing Dankbaekeit für uß Heimat, die füe Dich emme de Himmel op Aed woe.

 

Leev Schniedesch Fränzje, su nannten Dich in Dinger Kendheit un Jugend de Jruuße und die Kleine, die Ahle un die Jonge, Du häss et wiet jebraach! Nit nue, dat de jetz em Himmel beß un - wie de Die emme jewönsch häss - seche och e paa "Kende vom Rhing" jetroffe häss, die et Alleluja in de Mottesproch senge, nit nue, dat Du in uß Häzze wiede läävs, nä, Du häss et noch vill wiede jebraach als su manniche, dä he in Honnef zo de Lokaljröße zällt, - Du bes nämlich de allerieschte ächte Honneve Jong, dämm se e Denkmal setze. Un dat wied Die su leich keine nohmaache künne! Jetz bes de also widde metzen onder uns, jetz künne mie Die widde in et verschmitzte Jeseech luure un im Jeiste mit Die schwätze von Jott un de Minsche un von uß Heimat, von Honnef un de sibbe Berch.

Leev Freudeblömche, do stehs de nu he. Dä Steinmetz, he de Gerd Hardy, hätt aan Die si Meisterwerk vollbraach, su dat se all sare: "Jo dat eß uß Freudeblömche!" Dä Bildhauer hätt Die, weil mie et esu wollte, dat Booch in de Hand jedröck, dat Dich bekannt jemaach un Die ding Markezeiche jejovve hätt. Ävve hä hätt Dich och jenau studiert, ding Fotos aanjeluurt un e paa Texte jeläse. Un dobei hätte richtich erkannt, dat Du sälevs ene Freudenbrenge woes, un deswäje häls de ene Ruusestruuß hender em Röcke, womet de eene üvverrasche wells.

Leev Freudeblömche, mie sinn Die un de Löck he noch en Erklärung schöllig, wie Du aan die Stell he im "Sampich", also in de Bahnhofstroß, küß.

De ieschte Jrond es, dat et do, wo de eijentlich hinjehüet hätts, nämlich in de "Lönnesjaaß" (also de Rommeschdorve Stroß), wo de zoletz jelääv häss, vill zo eng es un de Passante nit bei Die stohn blieve künnte.

Un dann hätt och de Denkmalsstifte, de Bornheims Rolf, zojejävve, dat hä als ahle "Sampiche" Dich jäen in singer Nöh jehatt hätt, su dat hä Dich, wenne well, jeden Daach von singer Terrass her sehn kann. Ävve hä hatt och em Sinn, dat he Daach füe Daach vill Minsche inkoofe, ene drenke ode jätt esse john un dat Du dänne, die he in de Stadt erinkunn, entjäjen luurs un se fründlich empfängs un bejrööß. Hä hätt och aan die Pänz jedaach, die op de Bus waade on dobei off op de Äed setze. Dofüe han se jetz die zehn Sitzblöck rond ömm Dich erömm, un vielleich jelingk et jo, dat se sich och e besje füe Dich interessiere.

Och in Dingem Lävve hätt de "Sampich" en Roll jespellt. Su beß de he ömm de Eck, in de Bahnhofstroß 26, wo et ieschte Bürjemeisteamp woe, von Dingem Vatte standesamplich anjemeldt wuede, ävve iesch fönef Daach späde, weil hä wahl us luute Freud Ding Jebuet ze stark bejosse hatt. - Als de loofe kunns, su häste in de Erzählung "Zannping" jeschrivve, beß de met Dingem ieschte kranke Zant met Dinger Jroßmotte nomm Dr. Remmets he in de Bahnhofstroß jejange. Du woes noch esu klein, dat de noch nit läse kunns, dat op singem Firmeschild "Prakt. Arzt und Geburtshelfer" stunnt. Drußen füe singe Düe huet Ding Ping uß Angs op, un Du beß met Dinger Jroß widde heimjejange.

Ävve och in Dinge Schrefte kütt de "Sampich" emme widde vüe. Wämme he de Steinstroß erondejing, kom me üvve en Isebahnüvverjang aan de "Dude Arm" un zo de "Rhingsche", die am Ove wonnte. Eene von dänne woe de Rhingschiffe "Kroh Hännes", e Honneve Orijinal, dat Du in de Sammlung "Uß Ahle" su lebendig konterfeit häss. On wämme op em Röckwäch von de "Jrof" (Grafenwerth) üvve de Austroß jing, kom me aan de Villa Röder vüebei, die in enem Park loch, dä bes aan de Steinstroß jing.

Et "schöne Milla", dat von singer Motte verjötterte Mädche, dat kuet vüe singer Huhzitt met enem italienische Jraf sterve moot, un dat schräch jäjenüvve met singe Jeiße husende "Bocks Len" häste in dämm Roman "Das Sterben der Unsterblichen" verewich. Och Dinge Vatte, de Malemeiste Franz Josef Schneider, un Dinge Ohm, dä singe Altjesell woe, häste drin beschrivve, wie se wäjen de Huhzitt vum Milla de Spetze vum schmiedeiesere Zung rond ömm de Park erömm mit Blattjold verziere mohte.

Un wämme dann he de "Hohl" (Wolfshof) eropjeht, kütt me zomm "ahle Kirchhoff" omm Pompbeuel mit dämm Mausoleum füe et unsterbliche Milla un dämm längs vejessene Jraav vom jenau esu unsterbliche Stockhuse Len.

Leev unsterblich Freudeblömche, Du stehs he also op vertrautem Jebiet, un mie sinn fruh, dat Du aan düse Stell widde et Stadtbild metbestimmbs.

 

FJ Schneider Heimatdichter Denkmal Aan et Freudeblömche Jahrbuch Seite 91 92 93 94 95 96 97
Wie die Ahle songe... CD 30.11.1969 Et Freudeblömche 1922 Us Heimatlied - En Rondfahrt 25.März 1998 Impressum